نصايح للمسافرين

1.  السحب الآلي مهم جدا في السفر هذي الأيام، ولا تسمع كلام الربع ولا تسمعين كلام الصديقات، اتصل ببنكك واسأله عن نسبة الخصم اللي يصير عليك في كل مرة ، خذ المعلومة من مصدرها وليس من كلام الناس علشان تعرف اللي لك واللي عليك..  اتصل بالبنك واسأله وراح يفيدونك بكل شي ، حتى من مكان سفرك ممكن تتصل بالبنك.. لأن كل البنوك اليوم والحمدلله عندهم واتس أو اتًصال عبر الإنترنت وما يكلفك أي مبلغ .
2. لما تحجز شقة .. احرص إنك تعرف عدد الأفراد المسموح لهم يباتون معاك فيها ، ويجب الالتزام بهذا العدد علشات تتفادى إنك تدفع مبلغ لما تسلم الشقة ، بعضهم يتركك وما ينبهك لما تسلم الشقة ، فيطلب منك مبلغ إضافي في وقت يمكن يكون حرج بالنسبة لك وانت تستعد للعودة إلى الديرة .
3. التاكس فري صار من أهم برامج السفر والرحلة عند العوايل بالذات ، خاصة اللي مسافرين أوروبا أو تركيا ، وعلشان لا تضحي بمبلغ يصل أحيانا إلى أكثر من ألف دينار .. وعلشان لا تعيشون في ربكة وحوسة في المطار .. حاولوا إنكم تكونون في المطار قبل موعد رحلتكم بـ ٤ ساعات عالأقل .. 
4. التأمين الشامل للسيارة ثلاث أنواع ، نوع تدفع ٢٥٪ ونوع تدفع ١٠٪ والنوع الثالث ما تدفع أي مبلغ مهما كانت الأضرار .. قبل لا توقع معاملة استئجار السيارة .. تأكد من نوع التأمين اللي اتفقت مع الشركة عليه ، لا توقف عند كلمة أو مصطلح تأمين شامل وتمشي .. خل يكون تأمينك من النوع اللي ما يدفعك أي مبلغ ، والفرق بينهم مبلغ قليل جدا.
5. لما تبحث عن فندق معين إنت تبيه في موقع تعودت عليه وما لقيت  له حجز .. لا تيأس ، ابحث في موقع ثاني وإن شاء الله راح تلقى فيه حجز ، كل موقع له عدد محدود من الغرف أو الشقق الفندقية ، إذا ما حصلت حجز في موقع معين .. ابحث في موقع ثاني ، بين إيدك أكثر من سبعة مواقع إلكترونية معتمدة ..
6. لا تنخدع بسعر الفندق لما تشوفه مصنف خمس نجوم وسعره قليل.. ولا تستعجل وتحجز فيه.. تأكد قبل كل شي من موقعه ومكانه في المدينة ، يمكن يكون بعيد عن الداون تاون ووسط المدينة وتحتاج إلى باص أو سيارة أو تاكسي علشان تروح السوق أو الداون تاون .. أو يمكن يكون قريب من المدينة ، ولكن بينهم خط سريع أو حاجز .. دائما تصفح خريطة المدينة وتأكد من مكان الفندق فيها .
7. الآن يقدر كل مسافر إنه يسوي الـ check in في البيت قبل السفر بـ ٢٤ ساعة وهو سهل جدا.. تدخل الموقع الرئيسي لشركة الطيران ، وتتبع الخطوات و تختار المقاعد والكراسي وتطلّع البوردنج وإنت في البيت .. هذا راح يوفر عليك الوقت وما يخليك توقف في طابور البوردنج الطويل .
8. إذا كان عندكم شي ثمين في الجنطة اللي بتروح داخل الطيارة ، احرص إنك تسجل هالشي الثمين على الكاونتر ، يعطيك إيصال معين ، ولما توصل وجهتك تمر على مكتب معين علشان يتأكدون إن الشي الثمين موجود في الجنطة ، وما يضيع حقك وما تحاتي الجنطة والحقيبة خلال الرحلة .