سوالف حول القبر
أحمد ناصر
تخيلوا ان هالحوارات والسوالف تدور بين الناس وهم يقفون حول القبر، يودّعون شخصاً عزيزاً.. حول هذا المشهد الرهيب.. سمعوا سوالفهم.
الكنديشن
- اليوم مكيف السايق اخترب..
- شسويت؟
- لوّع جبدي، كل سنة أبدّل له المكيف، هالمره ببدله واخصم من معاشه.
- يا ابن الحلال لا تعوّر قلبك معاه، بدل المكيف وسو نفسك ما تدري..
- من صجك، تعبت معاه ولازم يعرف ان المكيف بفلوس مو نييبه من الشارع.
البطاقة المدنية
- شقاعد تسوي في البطاقة المدنية بوعلي، شفتك تحوس أمس؟
- بغيّر صورتي وقالوا لي لازم تراجع الموظف عالكاونتر..
- ليش تبي تغيرها؟
- لون شعري فيها أبيض، صورت صورة وصبغته أسود.. قلت أتشبب شوي بوعبدالله.
- انت شباب بوعلي، ما اعتقد يوافقون.. لازم الصورة مثل الواقع، الموظف ما راح يسوي لك شي.
- انا رايح حق واحد من الأهل.. والأمور طيبة ان شاالله، لا تقعد تسكر الموضوع بويهي خلك محضر خير جزاك البه خير.
باريس
- وين بتسافر بوجاسم السنه؟ الصيف جريب يخلص وانت للحين ما سافرت.
- ما اقدر أستغني عن باريس.. ديرة الجمال والعطور..
- (يضحك) وانت شكو بالجمال والعطور.. انت راعي شيشة وچاي أسود..
- ما عرفت صاحبك عدل، ما أخلي معرض ولا مهرجان للعطور او اللوحات التشكيلية الا وتلقاني أول واحد..
- لوحات تشكيلية؟ ياسلام.. وتفهم اللوحات أو بس تشوفها، هذا فن يبي واحد يفهمه.
- قلت لك.. انت للحين ما تعرف صاحبك.
موستنغ
- ها عزّوز.. جناح سيارتك الموستنغ مكسور، عسى ما شر؟
- الله يهدي شوارعنا، طحت بحفرة فانكسر الجناح.
- (يضحك) شنو علاقة الحفرة بالجناح..
- الظاهر مو مركب عدل.
- غيّر سيارتك الكحيانه، اشتر لك J Class احسن لك من السبورت..
- وااااو چان زين، بس الوضع المادي ما يسمح.
ليست هناك تعليقات:
إرسال تعليق